Fasih Akmal
jaḌon se sukhta tanha shajar hai
mire andar bhi ik pyasa shajar hai
hazaron andhiyan jheli hain us ne
zamin thame hue buḌha shajar hai
pujari jal chaḌha kar ja rahe hain
nagar men dukh ke sukh-data shajar hai
musafir aur parinde jante hain
ki in ke vaste kya kya shajar hai
jo ho fursat to us ke paas baiTho
qalandar hai vali baaba shajar hai
zamin par pyaar to zinda hai is se
ham insanon se to achchha shajar hai
hamare shahr men ‘akmal’ abhi tak
mohabbat banTne vaala shajar hai
Leave a Reply