Nabeel Ahmad Nabeel
charon janib pagal-ḳhane lagte hain
mausam aise hosh uḌane lagte hain
malba girne lagta hai sab kamre ka
jab teri tasvir jalane lagte hain
ghabra ke is daur ke vahshi insan se
divaron ko raaz batane lagte hain
aankh uTha kar jab bhi dekhun peḌon ko
mujh ko mere dost purane lagte hain
zehn men maazi jab bhi ghumne lagta hai
aankh men kitne aansu aane lagte hain
dil ke hathon ho ke ham majbur sada
armanon ki laash uThane lagte hain
patthar jaisi duniya hai ḳhud-gharzi hai
us ko kyuun kar dard sunane lagte hain
saath mire vo mil kar chand sitare bhi
hijr men tere niir bahane lagte hain
yaar ‘nabil’ unhen main jitna bhulta huun
mujh ko yaad vo utna aane lagte hain
Leave a Reply