ashna ho kar taghaful ashna kyuun ho gae
ba-vafa the tum to akhir bevafa kyuun ho gae
aur bhi rahte abhi kuchh din nazar ke samne
dekhte hi dekhte ham se khafa kyuun ho gae
in vafadari ke vadon ko ilahi kya hua
vo vafaen karne vaale bevafa kyuun ho gae
kis tarah dil se bhula baithe hamari yaad ko
is tarah pardes ja kar bevafa kyuun ho gae
tum to kahte the ki ham tujh ko na bhulenge kabhi
bhuul kar ham ko taghaful ashna kyuun ho gae
ham tumhara dard-e-dil sun sun ke hanste the kabhi
aaj rote hain ki yuun dard-ashna kyuun ho gae
chand ke tukde bhi nazron men sama sakte nahin
kya bataen ham tire dar ke gada kyuun ho gae
ye javani ye ghataen ye havaen ye bahar
hazrat-e-‘akhtar’ abhi se parsa kyuun ho gae
Leave a Reply