Hasnain Aqib
na satar satar men talash kar na ibaraton men talash kar
jo hamari tarah faqir hain unhen hashiyon men talash kar
jinhen bhulna tira mashghala unhen silsilon men talash kar
kabhi faslon se gurez kar kabhi qurbaton men talash kar
mujhe na-pasand qiyam-e-dil main qarar-e-jan ke ḳhilaf huun
mujhe gardishon ka junun hai mujhe raston men talash kar
mire shauq se tiri justuju ka mukalima hai ye dam-ba-dam
mira shukr tere qarib hai mujhe ne.amaton men talash kar
unhen ḳhud se thoḌa qarib kar jo azab-e-jan ka shikar hain
jo shikast dil ke mariz hain unhen rabton men talash kar
na vo raunaqen shab-o-roz men na vo razm men na vo bazm men
vo jo be-baha hai mata-e-dil use ratjagon men talash kar
vo jo ‘aqib’-e-tarab-ashna tha ḳhudi men apni hua hai gum
tujhe justuju hai usi ki to use ashiqon men talash kar
Leave a Reply