Poet
ḳhayal-e-marg baḌi shai hai zindagi ke liye
andhera jaise zaruri hai raushni ke liye
sukun ki bhiik na mangenge chashm-e-lutf se ham
gada banenge na do din ki zindagi ke liye
junun ne raz-e-haqiqat to pa liya lekin
ḳhuda ko kho diya zauq-e-ḳhud-agahi ke liye
baja ki rah-numa rahzan nahin lekin
musafir ab bhi taraste hain rah-ravi ke liye
jo teri chashm-e-tavajjoh pe ho gaya qurban
vo gham bhi kitna zaruri tha zindagi ke liye
ye dil ghamon se hai ma.amur ai ḳhayal-e-nashat
kahan se a.engi gunja.ishen ḳhushi ke liye
sahenge gham ke liye jabr-e-zindagi lekin
nazar na gham se bacha.enge zindagi ke liye
ḳhulus-e-dil ke tajassus men kho.e ham ‘muḳhtar’
nazar paḌi bhi to dushman pe dosti ke liye
Leave a Reply