tujhe bhi janchte apna bhi imtihan karte
kahin charagh jalate kahin dhuan karte
ka.i the jalva-e-nayab tujh se pahle bhi
kis aasre pe tira naqsh javedan karte
safina Duub raha tha to kyuun na yaad aaya
tiri talab tire arman ko badban karte
mohabbaten bhi tiri hain shikayaten bhi tiri
yaqin tujh pe na hota to kyuun guman karte
hava thi tez jalate rahe dilon men charagh
kaTi hai umr lahu apna ra.egan karte
vo be-jhahat ka safar tha savad-e-sham na sub.h
kahan pe rukte kahan yad-e-raftagan karte
dayar-e-ḳhvab men Thahre hisar-e-gul men rahe
magar ye gham hi raha ḳhud ko shadman karte
Leave a Reply