dekh lo tum ḳhu-e-atish ai qamar shishe men hai
aks dagh-e-mahr ka itna asar shishe men hai
log kahte hain tire ruḳhsar-e-taban dekh kar
sham.a hai fanus men ya ab-e-zar shishe men hai
raat din rahti hai niyyat bada-e-gul-rang men
ye pari vo hai ki jo aThon pahar shishe men hai
sa.ad-e-simin se tere us ko kya nisbat bhala
tauba tauba kab latafat is qadar shishe men hai
hoti hai gharq-e-araq kyuun tu siva.e bu-e-gul
aur kya ai bulbul-e-shorida-sar shishe men hai
mai-kada tera rahe abad ḳhum ki ḳhair ho
haan pila de mujh ko saaqi jis qadar shishe men hai
ḳhaak se meri bhala kya vaqt ka ho imtiyaz
har ghaḌi ban kar bagula muntashar shishe men hai
ye guman hota hai aks-e-mahr-e-sahba dekh kar
dagh-e-ulfat ko liye ḳhun-e-jigar shishe men hai
hazrat-e-va.iz na aisa vaqt haath aa.ega phir
sab hain be-ḳhud tum bhi pi lo kuchh agar shishe men hai
khinch sake hargiz musavvir se na timsal-e-adam
dekh lo tasvir-e-janan ta-kamar shishe men hai
thoḌi thoḌi raah men pi lenge gar kam hai to kya
duur hai mai-ḳhana ye zad-e-safar shishe men hai
mai pila kar mujh se kahte hain vo ho kar be-hijab
chaḌh ga.i a.ankhon pe jab ainak nazar shishe men hai
kyuun na zor-e-tab.a sab ahbab dikhla.en ‘habib’
imtihan-e-husn nazm-e-yak-digar shishe men hai
Leave a Reply