Dil Ki Manzil Us Taraf Hai Ghar Ka Rasta Is Taraf

dil ki manzil us taraf hai ghar ka rasta is taraf

ek chehra us taraf hai ek chehra is taraf

raushni ke istiare us kinare rah gae

ab to shab men koi jugnu hai na taara is taraf

tum hava un khidkiyon se sirf itna dekhna

us ne koi khat kisi ke naam likkha is taraf

ye mohabbat bhi ajab taqsim ke mausam men hai

saara jazba is taraf hai sirf lahja is taraf

maan ne koi khauf aisa rakh diya dil men mire

sach kabhi main bol hi paai na puura is taraf

ek halki si chubhan ehsas ko ghere rahi

guftugu men jab tumhara zikr aaya is taraf

sirf ankhen kanch ki baaqi badan patthar ka hai

ladkiyon ne kis tarah ruup dhara is taraf

ai hava ai mere dil ke shahr se aati hava

tujh ko kya paigham de kar us ne bheja is taraf

kis tarah ke log hain ye kuchh pata chalta nahin

kaun kitna us taraf hai kaun kitna is taraf

Leave a Comment