Suhaib Farooqui
havas ki hukm-rani ho rahi hai
mohabbat paani paani ho rahi hai
basar yuun zindagani ho rahi hai
ki jaise lan-tarani ho rahi hai
suḳhnavar ho zaban apni sanbhalo
suḳhan men bad-zabani ho rahi hai
paraya hai vo ab mera nahin hai
kisi ko ḳhush-gumani ho rahi hai
bula kar mujh ko mahfil se nikala
ye kaisi mezbani ho rahi hai
basa rakkhi hai dil men ek duniya
pasheman zindagani ho rahi hai
ye kis ka zikr aaya hai ghazal men
ye kaisi gul-fishani ho rahi hai
hisab-e-zindagi dena paḌega
raqam har ik kahani ho rahi hai
jafa us ki corona ki tarah se
bala-e-na-gahani ho rahi hai
kahan aati hai mujh ko sher-goi
ḳhuda ki mehrbani ho rahi hai
kisi tufan ka hai pesh-ḳhema
ḳhamoshi zu-ma.ani ho rahi hai
koi rangin lamha zehn men hai
jo surat zafrani ho rahi hai
karishma hai ye sab us ki nazar ka
javani javedani ho rahi hai
mubarra is se ab koi nahin hai
ana bhi ḳhandani ho rahi hai
Leave a Reply