Poet
ab guzara nahin us shokh ke dar par apna
jis ke ghar ko ye samajhte the ki hai ghar apna
kucha-e-dahr men ghafil na ho paband-e-nashist
rahguzar men koi karta nahin bistar apna
gham-zada uth gae duniya hi se ham akhir aah
zanu-e-gham se va-lekin na utha sar apna
dekhen kya lahja-e-hasti ko ki juun ab-e-ravan
yaan thaharna nazar aata nahin dam bhar apna
gar malun main kaf-e-afsos to hansta hai vo shokh
haath men haath kisi shakhs ke de kar apna
vaae qismat ki rahe log bhi us paas na vo
zikr laate the kisi dhab se jo akasr apna
zabah karna tha to phir kyuun na miri gardan par
zor se pher diya aap ne khanjar apna
niim bismil hi chale chhod ke tum kyuun pyare
zor ye tum ne dikhaya hamen jauhar apna
kya karen dil jo kahe men ho to ham ai ‘jurat’
na kahin jaaen ki hai sab se bhala ghar apna
Leave a Reply