nahr jis lashkar ki nigrani men tab thi ab bhi hai
ḳheme valon ki jo basti tishna-lab thi ab bhi hai
uḌ rahe hain vaqt ki raftar se maghrib ki samt
vaqt-e-aghaz-e-safar jo tiira shab thi ab bhi hai
vaqt jaise ek hi saa.at pe aa ke ruk gaya
pahle jis shiddat se jo dil men talab thi ab bhi hai
ham shikayat aankh ki palkon se karte kis tarah
dastan-e-zulm varna yaad sab thi ab bhi hai
husn men fitri hijabana ravish ab ho na ho
ishq ke maslak men jo hadd-e-adab thi ab bhi hai
roz o shab badlenge apne kis tarah aa.e yaqin
surat-e-halat jo pahle ajab thi ab bhi hai
hain baqa ke vasvase men ibtida se mubtala
dil men ik tashvish si jo be-sabab thi ab bhi hai
naam is ka amariyyat ho ki ho jamhuriyat
munsalik fir.auniyat masnad se tab thi ab bhi hai
Leave a Reply