Poet
dushman-e-jan hai na gharat-gar-e-din hai koi
phir bhi aram se duniya men nahin hai koi
barq ke saa.e men karte hain nasheman ta.amir
ham sa divana bhi duniya men nahin hai koi
ham bhi azad sahi aap bhi azad sahi
nasiya-sa.i se azad nahin hai koi
jo paḌe vo na sahen to karen kis se fariyad
asman apna hai ya apni zamin hai koi
jaur-e-ayyam se bardashta-ḳhatir na hua
is yaqin par ki rag-e-jan se qarin hai koi
kaisa andher hai saaqi ye tiri mahfil men
kisi aa.iin ka paband nahin hai koi
ab haram se koi nisbat na sanam-ḳhane se
ham sa azad bhi duniya men kahin hai koi
koi to baat hai sahil se jo uThTha tufan
na-ḳhuda ki to siyasat ye nahin hai koi
be-vafa se mujhe ummid-e-vafa hai ‘talib’
ḳhud-farebi hai ki ye husn-e-yaqin hai koi
ab kis ummid pe ye ah-o-fughan ai ‘talib’
ab to be-dad pe maa.il bhi nahin hai koi
Leave a Reply