dekhiyo us ki zara aankh dikhane ka maza
chitvanon men hai bhara saare zamane ka maza
kis maze se hai ayaan duzdi-e-dil hai zalim
luun chara kyunki tire aankh churane ka maza
lazzat-e-vasl koi puchhe to pi jaata huun
kah ke honton hi men honton ke milane ka maza
kya tire mai-kash-e-ulfat ka ye kaifiyyat hai
dard-e-dil kar ke bayan rone rulane ka maza
dast-bar-dil ho uthata huun ajab lazzat-e-dard
yaad kar hijr men vo haath badhane ka maza
jo khamoshi men hai lazzat nahin goyai men
be-khudi sa hai kahan aap men aane ka maza
us ke ladne ke bhi sadqe ki nazar aata hai
ain ranjish men ajab aankh ladane ka maza
khvab-o-khur se tire bimar ko kya kaam ki hai
lazzat-e-khvab na kuchh is ko na khane ka maza
yaad aata hai to jaata huun khuda jaane kahan
vo lagavat ki nigahon men bulane ka maza
kya kahun vasl ki shab le ke balaen us ki
kya uthata huun main zaanu pe bithane ka maza
main to phir aap men rahta nahin dil se puchho
aage phir bhench ke chhati se lagane ka maza
dar pe us parda-nashin ke ho to ba-saut-e-buland
sher us vaqt hai ‘jurat’ se padhane ka maza
Leave a Reply