Aslam Ansari
dars-e-adab-e-junun yaad dilane vaale
aa ga.e phir miri zanjir hilane vaale
kis tarah kho.e ga.e aks-e-ravan ki surat
shahr-e-hairan men tira khoj lagane vaale
ghaur se dekh koi hai pas-e-tasvir-e-ḳhizan
varna kis samt ga.e rang jamane vaale
ḳham-e-mehrab pe sadiyon ki siyah gard bhi dekh
taq-e-viran men lahu apna jalane vaale
zahr ab zahr hai karta nahin kar-e-tiryak
mar ga.e zahar ko tiryak banane vaale
fasl-e-be-barg kuchh aisi bhi to be-rang nahin
dastan ahd-e-baharan ki sunane vaale
daf-e-gul TuuT ga.i dast-e-saba men lekin
raqs karte hi rahe vajd men aane vaale
bujh ga.e shoḳh darichon men damakte mahtab
so ga.e raat ki taqdir jagane vaale
sochta huun ki ye mamura-e-gham ye duniya
kis liye tu ne bana.i hai banane vaale
Leave a Reply