Gopal Mittal
svang ab tark-e-mohabbat ka rachaya jaa.e
us ke pindar ko a.ina dikhaya jaa.e
vaz.a-dari-e-mohabbat ke munafi hai to ho
aaj collar pe naya phuul sajaya jaa.e
sher men tazkira-e-dasht-o-bayaban ho magar
ik baḌe shahr men ghar apna basaya jaa.e
balcony vo ka.i din se hai viran yaaro
us gali men koi hangama uThaya jaa.e
sar ye kahta hai gavara nahin ab barish-e-sang
dil ye kahta hai usi kuche men jaaya jaa.e
ham hi pichhe rahen kyuun da.ava-e-jan-bazi men
kya zaruri hai ki mar kar bhi dikhaya jaa.e
sha.iri men na raha jazba-o-ehsas ko daḳhl
ab use qaum ki ḳhidmat pe lagaya jaa.e
Leave a Reply