Poet
apni har baat zamane se chhupani paḌi thi
phir bhi jis aankh men dekha to kahani paḌi thi
main ne kuchh rang chura.e the kisi titli ke
aur phir umr hifazat men bitani paḌi thi
kal kisi ishq ke bimar pe dam karna tha
pir-e-kamil ko ghazal meri sunani paḌi thi
kucha-e-ishq se nakam palaTne vaale
tu ne dekha tha vahan meri javani paḌi thi
dil na sah paaya kisi aur se qurbat us ki
mujh ko divar se tasvir haTani paḌi thi
main bahut jald buḌhape men chala aaya tha
bin tire umr ki raftar baḌhani paḌi thi
us ki hasrat ka badan barf na ho jaa.e kahin
apne siine men mujhe aag lagani paḌi thi
tere ‘mumtaz’ ko gham maut ka bas is liye hai
apne balon men tujhe ḳhaak ravani paḌi thi
Leave a Reply