Poet
sukut-e-shab men tiri yaad dil men yuun aa.i
baja raha ho koi duur jaise shahna.i
ḳhud apne gham se lipaT kar ‘shahab’ so jaao
thaki thaki si shab-e-hijr ḳhatm par aa.i
kisi ko ranjish-e-be-ja bhi ab nahin ham se
khanak ke TuuT gaya saghar-e-shanasa.i
bhulane vaale mire din guzar hi ja.enge
magar Dase na tujhe sham-e-gham ki tanha.i
na koi va.ada na koi yaqin tha phir bhi
tumhari raah men shab bhar nigah dauḌa.i
kuchh is tarah se uThin meri samt vo nazren
ki jaise jaag uThe sub.h le ke angḌa.i
udasiyon ne kaha ab yahan nahin koi
kabhi nazar jo tire bam-o-dar se Takra.i
‘shahab’ hi ka fasana na sun liya ho kahin
falak pe kyuun ye sitaron ki aankh bhar aa.i
Leave a Reply