Shahzad Nayar
chahchahati bolti ankhon ka uncha shor hai
shaam ke dhundle shajar par kitna achchha shor hai
ashna.i ka safar tha aur kitni ḳhamushi
vapsi ka rasta hai aur kitna shor hai
zaat ki tanha.i men koi nahin hota sharik
band hain gaaḌi ke shishe andar apna shor hai
duur ke dalan se aati sadaon ki mahak
aur ubalte cha.valon ka dhima dhima shor hai
vo hai ḳhali ghar ki surat men bhara bazar huun
us ke jaisi ḳhamushi hai mere jaisa shor hai
shahr se behtar to virane ka sannaTa hi tha
kaisi kaisi boliyan hain kaisa kaisa shor hai
ḳhatm kar Dalega ik pal men sukut-e-be-dili
khel ke maidan se aaya hai zinda shor hai
raat ke pichhle pahar ka be-sada jangal samajh
meri ḳhamoshi ke andar be-tahasha shor hai
is taraf aata nahin koi ki us se puchh luun
asman ke paar se uThta ye kaisa shor hai
kaan men kohram dil men khaulti avaz ka
log lab-basta hain chehron se ubalta shor hai
hao-hu fariyad chiḳhen nala-e-dil-dad-gan
jhuuT hain saare dilase aur sachcha shor hai
Leave a Reply