Shana To Chhuta Zulf-E-Pareshan Se Ulajh Kar

shana to chhuta zulf-e-pareshan se ulajh kar

suljha na ye dil kakul-e-pechan se ulajh kar

leta hai khabar kaun asiran-e-bala ki

mar mar gae tariki-e-zindan se ulajh kar

zoron pe chadha hai ye mira panja-e-vahshat

daman se ulajhta hai gareban se ulajh kar

divane khat-o-zulf ke saude ki lahar men

kya kya na bake sumbul-o-raihan se ulajh kar

asar-e-qayamat kahin jaldi ho numayan

ghabrae hai ji ab shab-e-hijran se ulajh kar

Darta huun kahin taab nazakat se na khave

mu-e-kamar us zulf-e-pareshan se ulajh kar

sau pech men aaya hai hamara dil-e-sad-chak

shana ki tarah kakul-e-pechan se ulajh kar

girdab-e-bala men dil-e-ashiq ko phansaya

baali ne tiri zulf-e-pareshan se ulajh kar

tai kar gae sab kaba-e-maqsud ki manzil

ik rah gae ham nakhl-e-mughilan se ulajh kar

dauda hua jaata hai raqib us ki gali ko

yarab ye gire raste men daman se ulajh kar

jazb-e-dil-e-majnun ne kiya kaam jo apna

naaqa na ruka khar-e-bayaban se ulajh kar

yarab main use dekhun agar dida-e-bad se

rah jaae nazar panja-e-mizhgan se ulajh kar

ai tir-fagan bas hai yahi mujh ko tamanna

chhute na rag-e-jan tire paikan se ulajh kar

mat bahs raqiban-e-kaj-andesh se ‘ghafil’

be-qadr na ho aise safihan se ulajh kar

Leave a Comment