Jo Na Karna Tha Kiya Jo Kuchh Na Hona Tha Hua

Bismil Allahabadi

jo na karna tha kiya jo kuchh na hona tha hua

chaar din ki zindagi men kya kahen kya kya hua

ye samajh kar ham nahin kahte kisi se raz-e-dil

is taraf nikla zaban se us taraf charcha hua

bhar ke ThanDi saans liin bimar ne jab karvaTen

vo kaleja thaam kar kahne lage ye kya hua

suniye suniye atish-e-gham se hue ham jal ke ḳhaak

kahiye kahiye ab kaleja aap ka ThanDa hua

mere chehre se ayaan hai dekh lo pahchan lo

ye na puchho dil ka aalam dil ka naqsha kya hua