Thi Jo Anhoni Usi Baat Ko Karte Dekha

Shaukat Wasti

thi jo anhoni usi baat ko karte dekha

jiite ji dil ko ka.i martaba marte dekha

vaqt ko ranj men Thahra hua paaya ham ne

barq-pa gar use rahat men guzarte dekha

ro ke ji ho gaya halka to damak uTTha munh

phuul ko os ki bundon se nikharte dekha

pyaar hi pyaar men jo zaḳhm lagaya tha kabhi

taaza kuchh aur uga jab use bharte dekha

vo ki Thahraya gaya tha jise vazeh mamnua

ham ne har shaḳhs ko us rah se guzarte dekha

chand ko chaha ki vo us ke muqabil utre

chehra a.ine men us ne jo sanvarte dekha

‘shaukat’ is dahr ko jitna bhi sameTa ham ne

aap ko phir isi nisbat se bikharte dekha