Sufi
kamal-e-husn ka jis se tumhen khazana mila
mujhe isi se ye andaz-e-ashiqana mila
jabin-e-shauq ko asudgi nasib hui
sar-e-niyaz ko jab tera astana mila
tamam umr saharon ki justuju men raha
vo bad-nasib jise tera aasra na mila
kami na thi miri duniya men ashnaon ki
sitam to ye hai koi dard-ashna na mila
sanam-kadon men to asnam jalva-farma the
khuda ke ghar men bhi mujh ko kahin khuda na mila
tumhen to apni jafaon ki khuub daad mili
miri vafaon ka mujh ko koi sila na mila
chaman men rah ke bhi ‘atish’ khizan-nasibon ko
kabhi bahar ka paigham-e-jan-faza na mila
Leave a Reply