Bharat Bhushan Pant
ḳhvahishon se valvalon se duur rahna chahiye
jazr-o-mad men sahilon se duur rahna chahiye
har kisi chehre pe ik tanha.i likkhi ho jahan
dil ko aisi mahfilon se duur rahna chahiye
varna vahshat aur sukun men farq kya rah ja.ega
bastiyon ko jangalon se duur rahna chahiye
is tarah to aur bhi divangi baḌh ja.egi
pagalon ko pagalon se duur rahna chahiye
jo ghubar-e-rah-e-mazi men kahin gum ho ga.e
un bhaTakte qafilon se duur rahna chahiye
kya zaruri hai ki apne-ap ko yakja karo
TuuTe bikhre silsilon se duur rahna chahiye
Leave a Reply