raqs karte hain miri aankh men manzar kya kya
dekhta rahta huun main ḳhvab ke bahar kya kya
vaqt zalim ne bhula diin hamen kaisi baten
haa.e maazi ke ḳhazine men the gauhar kya kya
ik tire naam ka aana tha zaban par aur bas
ham pe barse hain har ik samt se patthar kya kya
ghar se bahar ko nikalna bhi to ghar aana bhi
din guzarte hain mire ranj uTha kar kya kya
ab jo aa pahunche hain tujh tak to nahin kahte ham
raah men khaa.i hai ushshaq ne Thokar kya kya
ek arsa hua dekha hi nahin us janib
jaane tabdil hua hai mire bhitar kya kya
jaane kya kaifiyyat-e-dil hai hamari imroz
naam rakkhe hain junun kaif badal kar kya kya
Leave a Reply