ik qayamat hai javani ik qayamat hai shabab
har tabassum ek tufan har nazar ik inqalab
har taraf ek ah-o-zari har taraf ek iztirab
kitni saughaten liye aaya hai daur-e-inqilab
saghar-o-mina paTak de toḌ de chang-o-rubab
dekh sar par aa chuka hai aftab-e-inqalab
ishq ke dastur duniya se alag dastur hain
is ki gumnami men shohrat is ki ḳhamoshi javab
ai miri nazron ki jannat kya tujhe ma.alum hai
kis ke sadqe ho rahe hain aftab-o-mahtab
main to kahta huun ḳhuda ka shukr karna chahiye
jaan de kar bhi jo ho jaa.e mohabbat kamyab
ai dil-e-gham-ashna ab to vo ham se chhuT ga.e
aur kya is se ziyada hoga koi inqalab
un se baten kar raha huun vo khaḌe hain samne
jagta rahta huun lekin dekhta rahta huun ḳhvab
bandishen donon taraf pabandiyan donon taraf
ek paband-e-mohabbat ek paband-e-hijab
mujh ko ai ‘sharib’ fishar-e-qabr ka kya ḳhauf ho
main ghulam-e-shah-e-yasrib main ghulam-e-bu-turab
Leave a Reply