haath se kuchh na tire ai mah-e-kanan hoga
haath jo hoga to miri maut ka saman hoga
saqiya hijr men mai-khana bayaban hoga
daur-e-saghar bhi ram-e-chashm-e-ghazalan hoga
ai junun phir mujhe khush aane lagi uryani
ab na daman hi rahega na gareban hoga
phir chalenge tira qad dekh ke gulzaron men
phir har ik sarv-o-saman sarv-e-charaghan hoga
ghar men dil phir mira ghabrane laga aap se aap
ai junun phir ye makan khana-e-zindan hoga
phir khush aati hai mire dil ko shab-e-mah ki sair
ishq phir chand se mukhde ka do-chandan hoga
in dinon phir tujhe ‘goya’ jo hai chupki si lagi
phir irada taraf-e-mulk-e-khamoshan hoga
Leave a Reply