ham baḌe dasht-e-bala se guzre
un se guzre na ḳhuda se guzre
barha shahr-e-vafa se guzre
ek sunsan faza se guzre
ham ne har baar dar-e-dil khola
hadse teri ada se guzre
dil men bikhre the tiri yaad ke phuul
gham ke lashkar bhi saba se guzre
talḳh yadon men thi ḳhushbu-e-vafa
ab ke jab ku-e-jafa se guzre
har qadam tiir malamat ke chale
laakh ham sidq-o-safa se guzre
ab hai tanha.i-e-dasht-e-furqat
raunaq-e-ku-e-jafa se guzre
Leave a Reply