Ghar Ko Ab Dasht-E-Karbala Likkhun

ghar ko ab dasht-e-karbalā likkhūñ

aaj ḳhud apnā marsiya likkhūñ

saada kāġhaz pe ḳhuun ke aañsū

ab use ḳhat meñ aur kyā likkhūñ

barg-e-gul par sabā ke dāman par

naam terā hī jā-ba-jā likkhūñ

zikr aa.e jo terī manzil kā

chāñd-sūraj ko naqsh-e-pā likkhūñ

ho tirā hī jamāl pesh-e-nazar

jab qalam se ḳhudā ḳhudā likkhūñ

maiñ to zinda huuñ mar chukā hai vo

apne qātil kā marsiya likhūñ

ai ‘sarosh’ apnī zindagī ko maiñ

kaun se jurm kī sazā likkhūñ

Leave a Comment