Poet
ada se dekh lo jaata rahe gila dil ka
bas ik nigah pe Thera hai faisla dil ka
vo zulm karte hain mujh par to log kahte hain
ḳhuda bure se na Daale mo.amla dil ka
phira jo kucha-e-kakul se koi puchhenge
suna hai luT gaya raste men qafila dil ka
hazar fasl-e-gul aa.e junun vo josh kahan
gaya shabab ke hamrah valvala dil ka
bahar aate hi kunj-e-qafas nasib hua
hazar haif ki nikla na hausla dil ka
ilahi ḳhair ho kuchh aaj rang be-Dhab hai
tapak raha hai ka.i din se aabla dil ka
ḳhuda ke haath hai ab apna ai ‘qalaq’ insaf
buton se hashr men hoga muqabla dil ka
Leave a Reply