naqsh-bar-ab ho gaya huun main
kitna kamyab ho gaya huun main
jhurriyan kah rahi hain chehre ki
ḳhushk talab ho gaya huun main
kya karunga main ab ḳhushi le kar
gham se sairab ho gaya huun main
yaad rakhta nahin mujhe koi
arsa-e-ḳhvab ho gaya huun main
is qadar bar-e-gham uThaya hai
jhuk ke mehrab ho gaya huun main
ik masiha ki mehrbani se
jam-e-zahrab ho gaya huun main
ḳhushk aansu hue hain jis din se
dasht-e-be-ab ho gaya huun main
hai ye ehsan jabr-e-duniya ka
saḳht a.asab ho gaya huun main
us ne jis din se chhu liya mujh ko
rashk-e-mahtab ho gaya huun main
ḳhud hi ‘ejaz’ apna dushman huun
sirf ahbab ho gaya huun main
Leave a Reply