nuur andhere ki fasilon pe saja deta huun
main siyah-baḳht charaghon ko jala deta huun
pahle ik jism banata huun kisi phuul pe phir
ek chehra kisi patthar pe bana deta huun
din nikalte hi kise DhunDne jaata huun main
raat ke pichhle pahar kis ko sada deta huun
ek arse se gham-e-hijr men masruf hai tu
aa mire dil men tujhe kaam naya deta huun
mujh sa saade bhi koi hoga zamane men ki main
apne qatil ko bhi umron ki dua deta huun
bahte dariya ka badan Dhank ke ḳhushk ankhon se
mom ke qalb ko patthar ki qaba deta huun
mustaqil rah-e-suḳhan ka huun musafir ‘nayab’
gar thakan likh duun varaq par to miTa deta huun
Leave a Reply