jabin-e-shauq itni to sharik-e-kar ho jaae
jahan sajda karun main astan-e-yar ho jaae
saba barham agar zulf-e-daraz-e-yar ho jaae
qayamat karvaten leti hui bedar ho jaae
bana do jis ko tum majbur vo majbur ban jaae
jise mukhtar tum kah do vahi mukhtar ho jaae
tujhe maalum kya ai khvab-e-hasti dekhne vaale
vahi hasti hai hasti jo nisar-e-yar ho jaae
jo ho jaae yaqin aenge vo rasm-e-ayadat ko
na ho bimar bhi koi to vo bimar ho jaae
guzar jaae hudud-e-maarifat se talib-e-jalva
jo be-parda kisi saaat jamal-e-yar ho jaae
hukumat hai junun par hast mansha tere vahshi ki
abhi divana ban jaae abhi hoshyar ho jaae
faqat itni itaat chahti hai rahmat-e-yari
ki insan ko gunah ka apne bas iqrar ho jaae
isi ko kamyab-e-did kahte hain nazar vaale
vo ashiq jo halak-e-hasrat-e-didar ho jaae
na hogi khatm phir bhi kashmakash shaikh-o-barahman ki
agar ham-rishta-e-tasbih bhi zunnar ho jaae
samajh lena vahin umr-e-ravan ki akhiri manzil
jahan par khatm ‘afqar’ justuju-e-yar ho jaae
Leave a Reply