in ghaTaon men ujale ka basera hi sahi
ḳhair agar aap ba-zid hain to savera hi sahi
ai gham-e-zist bulati hain mahakti zulfen
aaj ki raat ye pur-nur andhera hi sahi
dil men jo aag lagi hai vo kahan bujhti hai
raah shadab sahi abr ghanera hi sahi
hoshiyar ahl-e-ḳhirad ḳhak-nashin aa pahunche
aap ke zo.am ka aflak pe Dera hi sahi
tu pareshan na ho ḳhaliq-e-firdaus-e-barin
ye jahannam ye jahan aaj se mera hi sahi
kitni yaden hain ki nagin ki tarah Dasti hain
‘nur’ un galiyon ka ik aḳhiri phera hi sahi
Leave a Reply