Poet
hava ko thaam len ḳhushbu ka ehtimam karen
sanvar liya ho to ham chand se kalam karen
ham apne sog bhula ke unhen salami den
chalo ki hijr ke maron ka ehtiram karen
gulab-rut men kisi chhat pe rang le ke chalen
junun men bhigne valon ka intizam karen
purane beliyon se milte aa.en gaanv men
gali men baiThe faqiron ko bhi salam karen
vo shaḳhs dost tha ab vo adu hua to kya
vo aa raha hai jo milne to ehtimam karen
tumhen ye chaah ki ab long drive pe niklen
hamen ye fikr ki daftar ka thoḌa kaam karen
ham apni raah se bhaTke hue musafir hain
kinhen paḌi ki koi shaam apne naam karen
bahut baras hue hain parvarish kiye dukh ki
chalo ki dard ki shiddat ka ehtimam karen
Leave a Reply