asman tujh se kinara kahin karna hai mujhe
thak gaya uḌte hue aaj utarna hai mujhe
apne zaḳhmon ki hava di hai kisi sahil ko
apne ashkon se samundar koi bharna hai mujhe
chand ki naav hui raat ke sailab men gharq
phir se suraj ki kiran ban ke ubharna hai mujhe
yaad aata hai bikhar jaana miri hasti ka
aur us zulf ka kahna ki sanvarna hai mujhe
ab ye lagta hai ki main ḳhud men simaT aaya huun
aa ke chhu le ki phir ik baar bikharna hai mujhe
Leave a Reply