ba-zahir rang ḳhushbu raushni yak-jan hote hain
magar ye shahr andar se bahut viran hote hain
koi maane na maane guftugu karti hai ḳhamoshi
pas-e-divar-e-hasrat bhi ka.i tufan hote hain
ulajh jaa.en to suljhane ko ye umren bhi na-kafi
ta.aruf ke agarche silsile asan hote hain
sarabon ki ḳhabar rakhna gharon ko chhoḌne vaalo
ka.i ik be-dar-o-divar bhi zindan hote hain
yahan saari ki saari raunaqen reg-e-ravan se hain
bagule hi to registan ki pahchan hote hain
palaT aane ka rasta aur hi koi banata hai
musafir sab ke sab anjam se anjan hote hain
to phir ankhon men sapne ek se kyunkar nahin ugte
lakiron ke agar donon taraf insan hote hain
safar to chalte rahne ki lagan se shart hai ‘azmi’
jinhen chalna bahut ho be-sar-o-saman hote hain
Leave a Reply