hamare qaul o amal men tazad kitna hai
magar ye dil hai ki ḳhush-e’tiqad kitna hai
ki jaise rang hi le aa.ega lahu apna
vafa pe apni hamen e’timad kitna hai
ye janta hai ki va.ada-shikan hai vo phir bhi
dil us ke vada-e-farda pe shaad kitna hai
vo jis ne mujh ko faramosh kar diya yaksar
vo shaḳhs mujh ko magar ab bhi yaad kitna hai
hai ab to saare marasim ka inhisar us par
kisi ki zaat se ham ko mafad kitna hai
har ek soch hai aluda-e-havas yaaro
ragon men qatra-e-ḳhun ka fasad kitna hai
hai yuun to mere raqibon men iḳhtilaf bahut
mire ḳhilaf magar ittihad kitna hai
Leave a Reply