Rafiq Raaz
ghazab ki kaaT thi ab ke hava ke tanon men
shigaf paḌ ga.e hain be-zaban chaTanon men
hamare honT hi patthar ke hain vagarna miyan
ham ek aag liye phirte hain dahanon men
bagula ban ke uTha to main tha ḳharabe se
bapa hua na koi hashr asmanon men
siyah shahr ki qismat men mera faiz kahan
charagh-e-nazr huun jalta huun astanon men
Tapak paḌa huun bil-aḳhir main apni ankhon se
chhupa rakha tha mujhe tum ne kin ḳhazanon men
sukut ko na kabhi kar sada se aluda
ki ye zaban hai muqaddas-tarin zabanon men
suḳhan-shanas fasilon ka hai sukut ghazab
suḳhan-taraz hain zanjiren qaid-ḳhanon men
Leave a Reply