Zakiya Shaikh Meena
nafrat ke silsile ye adavat ke silsile
jaane kahan ga.e vo uḳhuvvat ke silsile
meri sabhi duaon ka ulTa asar hua
TuuTe chale ga.e teri chahat ke silsile
qaus-e-quzah gulab ruten chahaten tiri
ab ḳhvab ho ga.e vo rifaqat ke silsile
tum se bichhaḌ ke ziist men tanha hi rah ga.e
kab rakh sake kisi se mohabbat ke silsile
chingari kis ne phenki laga.i thi kis ne aag
sab bhuul kar baḌhate hain ulfat ke silsile
ghafil-mabash apne havalon se le sabaq
bikhre paḌe hain azm-o-shuja.at ke silsile
rishta kitab-o-ḳhama se mazbut kijiye
phir ustuvar honge farasat ke silsile
Leave a Reply