Nafrat Ke Silsile Ye Adawat Ke Silsile

nafrat ke silsile ye adāvat ke silsile

jaane kahāñ ga.e vo uḳhuvvat ke silsile

merī sabhī duāoñ kā ulTā asar huā

TuuTe chale ga.e terī chāhat ke silsile

qaus-e-quzah gulāb ruteñ chāhateñ tirī

ab ḳhvāb ho ga.e vo rifāqat ke silsile

tum se bichhaḌ ke ziist meñ tanhā hī rah ga.e

kab rakh sake kisī se mohabbat ke silsile

chiñgārī kis ne pheñkī lagā.ī thī kis ne aag

sab bhuul kar baḌhāte haiñ ulfat ke silsile

ġhāfil-mabāsh apne havāloñ se le sabaq

bikhre paḌe haiñ azm-o-shujā.at ke silsile

rishta kitāb-o-ḳhāma se mazbūt kījiye

phir ustuvār hoñge farāsat ke silsile

Leave a Comment