jaise koi daera takmil par hai
in dinon mujh par guzishta ka asar hai
zindagi ki band siipi khul rahi hai
aur us men ahd-e-tifli ka guhar hai
dil hai raz-o-ramz ki duniya men shadan
aql ko har aan tashvish-e-khabar hai
ik tavaqquf-zar men gum hai tasalsul
lamha-e-maujud goya umr bhar hai
zehan men rauzan anokhe khul rahe hain
jin se an-sochi havaon ka guzar hai
fasle taqsim hi hote nahin jab
‘saz’ phir kya sust-rau kya tez-tar hai
Leave a Reply