Ali Jawwad Zaidi
javani harif-e-sitam hai to kya gham
taghayyur hi agla qadam hai to kya gham
har ik shai hai faani to ye gham bhi faani
miri aankh gar aaj nam hai to kya gham
mire haath suljha hi lenge kisi din
abhi zulf-e-hasti men ḳham hai to kya gham
ḳhushi kuchh tire hi liye to nahin hai
agar haq mira aaj kam hai to kya gham
mire ḳhuun pasine se gulshan banenge
tire bas men abr-e-karam hai to kya gham
mira karvan baḌh raha hai baḌhega
agar ruḳh pe gard-e-alam hai to kya gham
ye maana ki rahbar nahin hai misali
magar apne siine men dam hai to kya gham
mira karvan aap rahbar hai apna
ye shiraza jab tak baham hai to kya gham
tire paas tabal o alam hain to honge
mire paas zor-e-qalam hai to kya gham
Leave a Reply