Abdullah Javed
main teri hi avaz huun aur guunj raha huun
ai dost mujhe sun ki main gumbad ki sada huun
jis raah se pahle koi ho kar nahin guzra
us raah pe main naqsh-e-qadam chhod raha huun
main apne usulon ka garan baar uthae
har vaqt havaon ke mukhalif hi chala huun
be-maya hababo mujhe dekho ki adam se
main su-e-abad sail ki surat men baha huun
har asr ki takhliq men kuchh haath hai mera
main vaqt ke zindan men bhi azad raha huun
sadiyon se main apne ko banane men huun masruf
banda huun magar ghaur se dekho to khuda huun
halat ki gardish se hirasan nahin ‘javed’
main gardish-e-aflak ki godi men pala huun
Leave a Reply