Be-Haqiqat Duriyon Ki Dastan Hoti Gai

be-haqiqat duriyon ki dastan hoti gai

ye zamin misl-e-sarab-e-asman hoti gai

kis kharabi men hua paida jamal-e-zindagi

asl kis naql-e-makan men raegan hoti gai

tangi-e-imroz men ainda ke asar hain

ek zid badh kar kisi sukh ka nishan hoti gai

dusre rukh ka pata jis ko tha vo khamosh tha

vo kahani bas isi rukh se bayan hoti gai

ik sada utthi to ik aalam hua paida ‘munir’

ik kali mahki to puura gulsitan hoti gai

Leave a Comment