jab hui ḳhaak to iksir hui hai baaba
aarzu miTne se tasir hui hai baaba
daagh hain qalb-o-jigar chhuT ga.e arbab-e-vafa
zindagi ab mujhe ta.azir hui hai baaba
dard hi charagar aur dard hi darman nikla
dard hi dard ki tadbir hui hai baaba
koi batla na saka talib-o-mtlub ka farq
yuun tariqat ki bhi ta.abir hui hai baaba
karbala dhuup hai to pyaas hai dariya-e-furat
ik sadaqat yunhi tahrir hui hai baaba
ḳhaak par sajda ho qatil ki chhuri shah-rag par
har sada nara-e-takbir hui hai baaba
nok neza pe koi bolta qur.an bhi tha
is tarah se kabhi tafsir hui hai baaba
Leave a Reply