shu.ur tak abhi un ki kahan rasa.i hai
abhi to kitne ḳhudaon ki vaan ḳhuda.i hai
guman-e-tirgi raḳhshandagi pe hone laga
dayar-e-shab ne ajab dastan suna.i hai
ab is pe duur nikal aa.e to ḳhafa kyuun ho
ye raah bhi to tumhi ne hamen dikha.i hai
kabhi jo mujh se mile vo rahe ḳhamosh magar
pas-e-sukut-e-zaban ḳhuub ham-nava.i hai
har ek fikr ki tah men ho jazba-e-ḳhalis
bahut hi saḳht taqaza-e-parsa.i hai
bahut hi ḳhuub ki dariya ke paas rahte ho
kaho ki pyaas bhi apni kabhi bujha.i hai
jo ḳhud hi jada-o-manzil se na-balad hai ‘obaid’
ajiib baat yahan us ki rahnuma.i hai
Leave a Reply