Zia Jalandhari
shajar jalte hain shaḳhen jal rahi hain
hava.en hain ki paiham chal rahi hain
talab radd-e-talab donon qayamat
ye ankhen umr-bhar jal-thal rahi hain
chamakta chand-chehra samne tha
umangen bahr thiin bekal rahi hain
dabe-panv miri tanha.iyon men
hava.en ḳhvab ban kar chal rahi hain
sahar-dam sohbat-e-rafta ki yaden
mire pahlu men ankhen mal rahi hain
tiri yaad aur be-ḳhvabi ki raten
ye palken aankh par bojhal rahi hain
bahut pechida hain chahat ke andaz
ki ab dil-dariyan bhi khal rahi hain
tarazu hain ḳhirad-mandon ke dil men
vahi baten jo be-aTkal rahi hain
‘ziya’ un sa.aton men umr guzri
khuli ankhon se jo ojhal rahi hain
Leave a Reply