dard ki jot mire dil men jagane vaale
roz paigham naya de ke rulane vaale
kaise likh duun main tire naam fasana koi
beach manjdhar men kushti ko Dubane vaale
na koi aks na zangar raha mere liye
ruuh ke shishe ko shaffaf banane vaale
kya nahin likkha nigahon ko rahin-e-jalva
apni tahrir se taqdir sajane vaale
misl-e-parvana taḌapne ke liye chhoḌ diya
sham-e-gumnam se jazbon ko jalane vaale
kisi ta.abir ko takmil to pa jaane de
ḳhvab har roz naya mujh ko dikhane vaale
azm-e-mohkam liye main pesh nazar aa.i huun
tiir alfaz ka be-ḳhauf chalane vaale
vaqt ab bhi hai sambhal jaao ye duniya hai fareb
pyaar ke Dhong men logon ko phansane vaale
vaqt ab duur nahin hai ki uThe shor-e-ghazab
gham ke sailab men duniya ko bahane vaale
Leave a Reply