Asad Badayuni
vo log bhi kaise log hain jo koi baat fuzul nahin karte
ye saare qisse jhuTe hain ham in ko qubul nahin karte
tumhen ilm nahin hai yaqin karo main qarib se janta huun un ko
kuchh saudagar aise bhi hain jo qarz vasul nahin karte
main patthar le kar baiTha huun aur is basti ke daana ab
kyuun kar-e-shisha-gari kar ke mujh ko mashghul nahin karte
kisi ran men saath husain ka den kis nahr se paani le aa.en
is shahr ke saare nauhagar koi aisi bhuul nahin karte
mire naam ke harf chamakte hain lekin ye chamak hai sho.alon ki
main ek aisi sachcha.i huun jise log qubul nahin karte
mujhe bhuul ke nadim mat hona ai agli naslon ke bachcho
haan apne buzurgon ka matam kabhi taaza phuul nahin karte
Leave a Reply