pyaar men us ne to danista mujhe khoya tha
jaane kyuun phir vo akele men bahut roya tha
us ko bhi niind nahin aa.i bichhaḌ kar mujh se
aḳhiri baar vo banhon men miri soya tha
mere ashkon men raha vo bhi barabar ka sharik
main ne ye bojh akele hi nahin Dhoya tha
raat bhar tujh ko sunata raha mera qissa
raat bhar chand dariche men tire goya tha
phuul nafrat ke uge hain to ta.ajjub kaisa
tum ne ulfat ka koi biij kahan boya tha
ḳhat pe Tapke hue aansu ye batate hain ‘shakil’
meri tahrir ko barish ne nahin dhoya tha
Leave a Reply