vahi hai gardish-e-dauran vahi lail-o-nahar ab bhi
raha karta hai roz-o-shab kisi ka intizar ab bhi
kabhi din bhar tiri baten kabhi yadon bhari raten
tiri furqat men jiine ke bahane hain hazar ab bhi
tira jalva jo pa jaati chaman men ja ke iThlati
bhikaran ban ke baiThi hai tire dar par bahar ab bhi
ḳhushi har-chand hai taari gai gham ki giran-bari
chhalak jaati hain ankhen adatan be-iḳhtiyar ab bhi
hue hain muntashir varna sitamgar tum se kya darna
hamari Thokaron men hai tumhara eqtidar ab bhi
agar ‘aḳhlaq’ se milte mohabbat ke chaman khilte
na banti bazm-e-yaran ek gah-e-kar-zar ab bhi